பொறுப்புத் துறப்பு

பற்பல துறைகளிலும் சிறப்புற்று விளங்கியவர் அகத்திய மாமுனிவர். அறிவியல், இலக்கியம், மருத்துவம், வானியல், ஆன்மிகம் என்று ஏராளமான துறைகளில் இவருடைய பங்களிப்பைக் காணலாம். அகத்திய மாமுனிவர் இயற்றிய நூல்களும் ஏராளமானவை. இவற்றில் பல கிடைத்தில. எனினும், காலப்போக்கில், அகத்தியரின் பெயரால் பற்பல நூல்களும் வழங்கப்பட்டுவருகின்றன. இவ்வாறே பற்பல நூல்கள் அச்சிடப்பட்டும், பதிப்பிக்கப்பட்டும், சீரமைக்கப்பட்டும், மறுபரிசீலனை செய்யப்பட்டும் உள்ளன. காலங்கடந்து நிற்கும் எந்த நூலிலும் காணப்படுதல் போன்றே, இவற்றிலும் இடைச்செருகல்களும், இடையீடுகளும் உள்ளன. பிற்காலத்திய நூல்கள் பலவும்கூட, அகத்தியர் என்னும் பெயரால் வெளியிடப்பட்டுள்ளன. மரியாதை கருதியோ, ஆசான் பரம்பரை என்பதைச் சுட்ட வேண்டியோ, சான்றோர் பயரைத் தமக்கிட்டுக் கொள்ளும் வழக்கத்தின் பாற்பட்டோ, இவ்வாறாகப் பயன்படுத்தியிருக்கக்கூடும்.
இத்தளத்தில் பதிவேற்றம் செய்யப்பட்டுள்ள நூல்கள், பதிப்புகள், கட்டுரைகள் போன்றவை, ஆர்வமுள்ள வாசகர்களுக்கு ஒரே இடத்தில் கிட்டவேண்டும் என்னும் ஒரே நோக்கில் மட்டுமே பதிவேற்றம் செய்யப்பட்டுள்ளன. செம்மொழித் தமிழாய்வு மத்திய நிறுவனம், இவற்றை முறைமைப்படுத்தவோ, அங்கீகரிக்கவோ இல்லை; மாறாக, மறுதலிக்கவும் இல்லை.
ஆய்வுக் கட்டுரைகளைப் பொறுத்தவரை, அவ்வவ்வாய்வுகள் குறித்து செ.த.ம.நி. எவ்வித கருத்தும் கூறவில்லை.